قيس و ليلى

عارف حضرتك الناس بتقول كل يغني على ليلاه لكن مصيبتنا السودة مقاس 45 برباط غير مربوط إن مِش كل ليلى بتغني لقيساه و الأستاذ قيساه يا كبد أمه مِسَلّم النِّمَر و ليلى مِصَدّرة له الطّرشة و لا مِعَبّراه و لا تعيره إلتفاتا و لكن بتعايره بخيبته لأنه ما بيفهمش في البيجو و ما بيعرفش !! و لأنه ما بيعرفش فبقت شُغلانة و جُرَس و فضايح للركب و اللي سرق أكل النبق لكن عندنا اللي سبق بيأخد على دماغه تريقة و تكسير مقاديف و ضرب و شلاليت و بُونِيّات و فين يوجعك أصله مش ع المعدة .. مش قادرين يصبروا على اللي سبق و يشوفوا حيعمل إيه للآنسة ليلى ! إيه بتقول مدام ؟!! يا راجل ! ماشي قصدي حيعمل إيه لمدام ليلى .. و قالوا في الأمثال ده مخطط عالمي لضرب مصر من جميع الإتجاهات و قالوا في الأمثال تهيج الشعوب على حكامها الفاسدين و تصعد الأحزاب الإسلامية للحكم و كأن الشعوب مِش إسلامية (طنش و فوّت) عشان يعملوا كل شوية حجة و أكثر من سبب لشن الحروب على مصر و غيرها .. و المخطط شغال و أن ما عنديش مشكلة في مخططاتهم لكن عندي مشكلة و هي فين مخططاتنا ؟ و فين خططنا ؟ هو إحنا ما عندناش خطط و تخطيط و تدبير و ترتيب و تنظيم و اللبيب بالإشارة يفهم يا أم ميمي .. بس بصراحة يا أخي عندنا عالم غريبة و مناظرهم و أشكالهم عجيبة و فيهم شبه من شاحن نوكيا !! لكن شحنهم كله لمصالحهم و ألاضيشهم و بس .. لكن زي ما قلت لحضرتك قبل كده إن صالح مصر عند عمك صالح و عمك صالح تعيش انت .. و القميص كان ب 6 زراير و كرافتة مربوطة و صديري و جاكتة مقفولة و مع ذلك نشلتي قلبي يا مصر و بموت في دباديب أم اللي خلفوكي .. هات لي يا ابني حاجة ساقعة الدنيا برد .. ولع .