تيجى نلعب.. ثورة تانية!

  بقلم   محمد أمين    ٥/ ١/ ٢٠١٢

هناك شعور بأن الثورة اتسرقت.. وهناك رغبة فى ثورة تانية.. موعدها ٢٥ يناير أيضاً.. هيه دى اللى قال عنها المجلس العسكرى مخطط للفوضى.. النظام السابق قال كده بالضبط على الثورة.. فوضى.. لا مبارك اختلف بشأن الثورة الأولى.. ولا «العسكرى» اختلف بشأن الثورة الثانية.. «يعملها العيال» ويقع فيها المجلس العسكرى.. فمن ينتصر أخيراً؟.. شباب الثورة أم السلطة؟.. إليكم تفاصيل الحوار: - هوه إنتو عاوزين تخربوا البلد؟! - لأ إحنا عاوزين نعمرها.. نبنيها صح الصح! - يا سلام.. عاوزين تعملوا دولة من الصفر؟! - وليه لأ يا سيدى؟! - يا بنى مصر حضارتها سبعة آلاف سنة.. اصحوا وفوقوا! - إيه المانع تبقى النسخة المنقحة والمزيدة لمصر.. الطبعة الثانية؟! - إحنا خلاص أسقطنا النظام.. إنتو عاوزين تسقطوا الدولة؟! - لأ مش عاوزين نورث دولة عشوائية.. هنبنيها على نضافة! - إنتو بتمارسوا ديكتاتورية، ألعن من ديكتاتورية النظام الفاسد؟! - بالعكس إحنا لازم نجيب محرات، يرسم صورة الأرض من جديد.. قبل ما نزرع! - نهاركم إسود.. مصر مش ناقصة.. محرات وحمار، وبلا أزرق! - إحنا عملنا الثورة.. وهنلعب ثورة تااااااانى.. ٢٥ يناير! - هوه إنتو هتلعبوا استغماية؟! - عارف أنك مش مقتنع ولا مصدق.. بس إحنا نازلين؟! - تنزلوا تحتفلوا بعيد الثورة.. غير كده لأ!! - بقولك ثورة تانية.. تطهير وقواعد جديدة، ووجوه جديدة! - تقصد انقلاب على الثورة.. وإشاعة الفوضى؟! - لأ.. تصحيح الثورة.. وحماية الثورة من أعدائها، واللى ركبوها! - بس دى مخاطرة مش محسوبة.. وممكن يندس دخلاء يحرقوا الوطن! - ما تخافش.. إحنا «العيال بتوع التحرير» (بسخرية)! - مين قال عليكم عيال؟.. وليه السخرية دى؟! - ده اللى بيتقال علينا.. سواء فى الشارع، أو المجلس العسكرى! - يا بنى اعقلوا.. الحكاية مش كده.. لا غالب ولا مغلوب! - يعنى نسيب الثورة تتسرق؟.. بدأنا ولازم نكمل المشوار! - ولو خربت.. هتاخد منها قالب؟! - نلعب ثورة تاااااانى.. ما وراناش حاجة! - آآآآه.. طيب شوف السيناريو، لو ظهر طرف تالت؟! - تقصد كلام المجلس العسكرى، ومخطط الفوضى؟! - طبعاً.. وده احتمال وارد! - تبقى مسؤولية «العسكرى».. هوه اللى ساااااايق؟! - المشكلة إنكم بتحطوا البلد فى حالة اختبار من جديد؟! - الجيش عارف ان الدعوات للثورة الجديدة مش هزار! - قلبى حاسس بالخطر.. مصر هتولع بسببكم! - خليك الطرف العاقل.. وهنشوف مين ينتصر؟! - الخبرة هتلعب.. الثائر الحق هو اللى......؟! - (يقاطع) هتقولى بقى الثائر الحق، لحد الثورة ما تتسرق؟! - ده كلام الشيخ الشعراوى.. مش عاجبكم؟! - الثائر الحق هو الذى يثور ليهدم الفساد.. ثم يهدأ ليسمع كلام العسكرى.. هههههه! - اركبوا دماغكم.. واحرقوا مصر! - طيب اشتروا دماغكم.. وخلونا نطهرها.. وننزل اللى ركبوا الثورة؟!