السبت، 7 يناير 2012

قطر الثورة ماشي بينا .. ماشي ماشي

ركبنا القطر كلنا اللي في السبنسة و اللي مِسطّح و اللي درجة ثالثة و ثانية و أولى و العطشجي و السواق و الكمسري و النشالين و الحرامية و بياعين الحاجة الساقعة و البقسماط و أنا و انت و هي .. القضبان طريقنا و أي خلل فيها معناه كارثة أو توقف القطار .. و كل قطار و له محطات و أحلى محطة هي محطة الوصول و الأحضان بعد رحلة طويلة فيها عناء السفر و رفاق الرحلة و كل رحلة فيها خناقة و صُحبة و أحيانا بَصبصة غير بريئة بين فتى و فتاة و في القطر تلاقي وزة بطة حلة محشي مِشنة عيش سَبت جبنة حادقة و بلاص مِش و فطير مشلتت و حمام و فراخ .. و ناس متعطرة أنيقة لابسة اللي على الحبل مع نظارة سودا سيدات و رجال كله عايز يوصل محطته ! و في كل محطة ينزل الغني و الفقير و الجلابية و البنطلون و الحرامي و الشريف و الرجل و السيدة و الطفل و كله و له حكاية و ذكرى أو ناسي أي حاجة لأنه كان نايم و واخد تعسيلة و أخلى شخير .. القطار هو صورة مصغرة لرحلة حياة ! لكنني أتكلم عن قطار مصر لذلك نريده قطار له سواق ماهر و عطشجي فنان و قضبان قوية و فلنكات مضبوطة و تحويلة في وقتها و مزلقان آمن و صنافور صح و لا صنافور بنها و إدارجية و ناظر محطة فاهم شغله و تطوير مستمر لكل أفراد المحطة و القطار و لما توصل على الرصيف إفتكرني بساندوتش جبنة على طعمية على طماطم و إحجز لي معاك تذكرة و إختار لي مكان جنب راجل طيب أو جنب أم ميمي .. إتفضل إنزل وصلنا محطة مصر .. أهلا وسهلا حمدا لله على السلامة إتفضلوا إنزلوا و اشتغلوا لمصر و حِبّوا مصر و حبوا كل المصريين أسيبكم بقى عندي رانديفو من رحلة القطار ! إنت رُحتي فين يا اللي في بالي ؟! .. هات شاي يا ابني .. ولع .

ليست هناك تعليقات:

إرسال تعليق

موسوعه حكم مصر من بداية عهد الفراعنة https://youtu.be/jJ